Gen 35 | NdeIBE | STEP | UNkulunkulu wasesithi kuJakhobe, “Yana eBhetheli wakhe khona, njalo khonapho wakhele uNkulunkulu i-alithare, yena owabonakala kuwe lapho wawubalekela umnewenu u-Esawu.”

Genesis 35

UJakhobe Ubuyela eBhetheli

1 UNkulunkulu wasesithi kuJakhobe, “Yana eBhetheli wakhe khona, njalo khonapho wakhele uNkulunkulu i-alithare, yena owabonakala kuwe lapho wawubalekela umnewenu u-Esawu.”

2 Ngakho uJakhobe wasesithi kwabomuzi wakhe lakubo bonke ababelaye, “Lahlani onkulunkulu bezizweni labo elilabo, lizihlambulule, lintshintshe lezigqoko zenu.

3 Beselisiza sihambe siye eBhetheli lapho engizakwakha khona i-alithare likaNkulunkulu yena owangisizayo ngosuku lokuhlupheka kwami njalo oselokhu elami loba ngingaze ngiye ngaphi.” 4 Yikho besebemupha uJakhobe bonke onkulunkulu bezizweni ababelabo lamacici ayesezindlebeni zabo, uJakhobe wakumbela ngaphansi kwesihlala som-okhi eShekemu.

5 Yikho basebesuka kwathi ulaka lukaNkulunkulu lwafikela yonke imizi ababakhelane layo, akwaze kwaba khona oxotshana labo.

6 UJakhobe wafika eLuzi (leyo yiBhetheli) kanye labo bonke ayelabo elizweni laseKhenani. 7 Wakha khona i-alithare, indawo waseyibiza ngokuthi yi-Eli-Bhetheli, ngokuba kwakulapho uNkulunkulu aziveza khona ngesikhathi ebalekela umfowabo.

8 UDebhora, umlizane kaRabheka wafa, wambelwa ngaphansi kom-okhi ngezansi kweBhetheli. Yikho yathiwa yi-Aloni Bhakhuthi.

9 UJakhobe esebuyile ePhadani Aramu uNkulunkulu wabonakala kuye njalo, wambusisa. 10 UNkulunkulu wathi kuye, “Ibizo lakho linguJakhobe, kodwa kawusayi kuthiwa unguJakhobe; ibizo lakho selizathiwa ungu-Israyeli.” Yikho wamutha wathi ngu-Israyeli.

11 UNkulunkulu wathi kuye, “NginguNkulunkulu uSomandla; zalanani lande ngobunengi. Kuzaphuma kuwe isizwe lezinhlanga zezizwe, lamakhosi azavela emzimbeni wakho. 12 Ilizwe engalinika u-Abhrahama lo-Isaka ngilinika wena lawe, njalo ilizwe leli ngizalinika izizukulwane zakho eziza emva kwakho.” 13 UNkulunkulu wasephakama emtshiya endaweni lapho ayeke wakhuluma laye khona.

14 UJakhobe wamisa insika yelitshe endaweni leyo uNkulunkulu ayekhulume laye khona, wasethululela phezu kwayo umnikelo onathwayo; wathela njalo amafutha phezu kwayo. 15 UJakhobe wasebiza indawo leyo lapho uNkulunkulu akhuluma laye khona ngokuthi yiBhetheli.

Ukufa kukaRakheli lo-Isaka

16 Basebehamba besuka eBhetheli. Kwathi belokhu bebucwala kwe-Efrathi, uRakheli wahelelwa kwaba nzima ukubeletha. 17 Kwathi ekulobobunzima bokubeletha umbelethisi wathi kuye, “Ungesabi. Ngokuba uzazuza enye indodana.” 18 Kwathi esephela – ngoba wayesesifa wetha indodana yakhe wathi nguBheni-Oni. Kodwa uyise wayo wayithi nguBhenjamini.

19 Wafa kanjalo uRakheli wambelwa endleleni kuyiwa e-Efrathi (kutshiwo iBhethilehema.) 20 UJakhobe wakha insika phezu kwethuna, kuze kube lamhla insika leyo itshengisa ithuna likaRakheli.

21 U-Israyeli wabuye wathutha wayamisa ithente lakhe ngale kweMigidali-Ederi. 22 UIsrayeli esakhile kulowommango uRubheni wasuka waselala lomfazi weceleni kayise uBhiliha, kwafika ezindlebeni zika-Israyeli. UJakhobe wayelamadodana alitshumi lambili:

23 Amadodana kaLeya yila: uRubheni, izibulo likaJakhobe, uSimeyoni, loLevi, loJuda, lo-Isakhari loZebhuluni.

24 Amadodana kaRakheli yila: uJosefa loBhenjamini.

25 Amadodana encekukazi kaRakheli, uBhiliha yila: uDani loNafthali.

26 Amadodana encekukazi kaLeya uZilipha yila: uGadi lo-Asheri. La ayengamadodana kaJakhobe awazalela ePhadani Aramu.

27 UJakhobe weza ekhaya kuyise u-Isaka eMamure, eduze leKhiriyathi-Abha (kutsho iHebhroni) lapho u-Abhrahama lo-Isaka ababehlala khona. 28 U-Isaka waphila okweminyaka elikhulu lamatshumi aficamibili.

29 Wafika ekucineni wafa wembelwa labantu bakibo eseluphele, iminyaka isiminengi. Amadodana akhe u-Esawu loJakhobe bamngcwaba.